[ad_1]
呢幾日政府不斷用一個大家都好陌生嘅用語：「小區」，係咁講要喺深水埗同油尖旺進行「小區檢測」。
大家隱隱約約都感覺到呢個係一個大陸用語，但其實並唔係咁簡單，佢同我哋用開嘅「社區」並唔係相等嘅字詞。
小區俄語係микрорайо́н，係特指蘇聯特別設計嘅一種住宅群組，基本上蘇聯式嘅國家都係以呢種概念建立城市，大陸都唔例外。喺小區入邊有獨立嘅公共設施同學校，相對上獨立運作。
但深水埗、油尖旺呢啲社區用「小區」嚟形容，就可謂大錯特錯。香港尤其係九龍西社區之間係有相當大嘅互動，地理上來往兩區行路都只係15分鐘，人會跨區返工返學，城市密集嘅人口流動根本唔可以用「小區」嚟形容。
唔好以為「小區」同「社區」只係一字之差，稱呼有別，更加反映抗疫政策上嘅大錯特錯。
而家香港跟大陸嗰套，當社區係小區咁局部加強檢疫，諗住可以鎖定同控制傳染；然而油尖旺同深水埗基本上係香港人口最密集同流動最頻繁嘅社區，根本唔係可以搵晒一棟兩棟大廈，進而一區嘅人檢測晒、隔離晒就可以阻截傳染，因為一棟大廈嘅人好容易其實已經走勻晒十八區。
香港一開始係用傳染病學嘅科學概念，以人與人之間嘅社交接觸而非粗疏嘅地理關係分類，追蹤特定群組進而搵出源頭，阻截病源同埋搵出傳變關係；
但近月政府開始用詞同方法上都跟大陸有樣學樣，又放棄科學嘅方法同概念，學人叫「小區」，又不斷做檢測，殊不知地域交通差異懸殊，唔可以照辦煮碗。
最終唔單止係語言上不知所云，抗疫政策更一榻糊塗。市民唯有自救，拒絕歪風，知多啲概念，喺社區上講多啲「人話」。
[ad_2]