[ad_1]
香港嘅官僚文化之深，令我地連巴西都不如。
讀醫幾年，我地學生其一最常掛係口邊嘅，係”I will balance the risks and benefits”，唔識答教授問題時，就講呢句出黎當答左、拖時間。咁有咩risk有咩benefit，有幾多%，點比較，唔識呀嘛，吹住水先。
結果今日聽疫苗記者會，聽兩位教授重覆呢句講左成個鐘。然後叫大家等唔知幾時嘅某日會上載報告上食衞局網站。（我去開一下個網，先發現個網站設計停留左係十年前。）
諷刺嘅係，今朝為左寫上一個關於科興疫苗數據嘅Post，我走去睇巴西當局記者會。睇佢地嘅匯報，我雖然一句葡文都唔識，要慢慢逐句翻譯，但佢地嘅記者會有哂幾十幅詳盡圖表同各種數字，由研究框架、統計學模型、病人數據、研究結果，仔細至如何定義輕、中、重症嘅計分系統，都一一解釋比公眾聽，即使言語不通如我都得到多好多資訊。因為佢地真係尊重公眾知情權。
而香港，就係話呢樣要交比食衞局豁下兩個科學委員會傾、呢樣比返官員傾、呢樣就等新成立嘅「新冠疫苗臨床事件評估專家委員會」傾，個名長到劉教授都讀得好吃力，我都聽到頭痛。而結果記者問嘅資訊，問左十次都冇答案。
相信呢啲都唔係兩位教授嘅錯，好似巴西官員咁簡單匯報下研究數據，兩位絕對唔會做唔到。但今日政府安排嘅記者會中，佢地有咩講得有咩唔講得，恐怕都唔係佢地決定，而要睇請佢地返黎嘅政府比幾多空間佢地做。
這就是香港政府領導之下，必然出現的水準。
[ad_2]